राप्रपाका प्रवक्ता ठाकुरप्रसाद शर्माले विद्यालय पोसाकसहित जुलुसमा हिँडाउने प्रचारमा दौडाउने दल र बालबालिकाको दुरुपयोग नगर्ने सबैलाई एकै दृष्टिमा हेर्नु नहुने विचार राख्नुभयो । तराई मधेस लोकतान्त्रिक पार्टीका केन्द्रीय सदस्य दीपेन्द्र मिश्र, मधेसी जनअधिकार फोरम (लोकतान्त्रिक)का सचिव रवीन्द्र ठाकुर, सिविन नेपालका अध्यक्ष माधव प्रधानले आसन्न संविधानसभा निर्वाचन र निर्वाचनपछि बन्ने संविधानमा बालअधिकारका विषयमा प्रकाश पार्नुभएको थियो । कार्यक्रममा राष्ट्रिय मानव अधिकार आयोगका पूर्व सदस्य गौरी प्रधानले विसं २०५२ देखि ११ वर्ष चलेको सशस्त्र द्वन्द्वले बालबालिकाको बाँच्न पाउने, विकास र सहभागिताको अधिकार कुण्ठित गरेसँगै राजनीतिक अस्थिरताले अहिलेसम्म उचित वातावरण बन्न नसकेको औँल्याउनुभयो । उहाँले बालबालिकाको वर्तमान र भविष्य सुरक्षित र सुनिश्चित गर्न प्रत्येक घर परिवार, समुदाय र सरकार गम्भीर बन्न नसकेकाप्रति दुःख व्यक्त गर्नुभयो । संयुक्त राष्ट्रसङ्घीय बाल कोष (युनिसेफ), सिविन नेपाल र राष्ट्रिय योजना आयोगले संयुक्तरूपमा हालै गरेको एक सर्वेक्षणअनुसार नेपालमा एक वर्षमुनिका सबै बालबालिकालाई दिइने खोप झन्डै १५ प्रतिशतले नपाएका, ४१ प्रतिशत बालबालिका कुपोषित रहेकाप्रति एक हजारमा ५४ जना बालबालिका र प्रतिहजारमा ३४ जना शिशु अवस्थामै ज्यान गुमाउने गरेका तथ्याङ्क छ ।